ENTREVISTA A ALBERTO TORGA
por David Pandiella Teresa
Alberto Torga Llamedo ye un cura sacerdote que vive en Nava, foi cura en Nava, en Somió y tuvo de misioneru en Holanda y Alemaña. Agora dedícase a da-yos catequesis de confirmación a los neños navetos.
¿Cómo foi la to infancia cuando yeres pequeñu?
Yo nací nel añu 1936, agora tengo 82 años.Yo yera de Tresali que ye un pueblu del conceyu de Nava y diba ellí a la escuela.
¿Cuándo yeres pequeñu, cómo vivíes?
La verdá que yo nun me puedo quexar. Tenía abondo comparao con otros neños. Tengo'l recuerdu de ver dalgunos neños que diben descalzos a clase y yo tenía unos zapatos pa cada mes. Anque yo de pequeñu tuvi un problema y ye qu'entamé a fumar dende bien rapaz, entamé a fumar con 8 años.
¿Qué te gustaba facer de pequeñu?
Cuando yera neñu nun había xuguetes, como muncho tenía una peonza. Lo que facíamos tolos neños yera depués de trabayar en casa dir polos praos a xugar al balón o imaxinanos que yéramos ganaderos. Nun teníamos muncho, pero pasábamoslo perbien.
¿Qué alcordances tienes de Nava?
Alcuérdome qu'enantes en Nava díbase al mercáu o a por piensu o a por comida caminando y que nun había problema polos coches yá que nada más que había tres coches: el del médicu de Nava, el del médicu de Cecea y el d’un paisanu con perres.
¿Cuándo marchasti de Nava ?
Marché a los 18 años al seminariu d’Uviéu y namás qu’acabé, marché a Somió a exercer de cura, anque ellí tuvi problemes por motivos políticos y mandáronme a Onís y el día que llegué foi un día feliz, porque me recibieron perbien. Depués yá marché pol estranxeru.
¿Cuándo marchasti pa fuera?
Marché a los 32 años pa Nuremberg, n’Alemaña y ellí tuvi de sacerdote; amás ayudaba d’interprete cola xente de fuera.
¿Cómo yera la to vida per fuera‘l país?
Yo tuvi facilidaes pa entender los idiomes anque nun-y lo recomiendo a naide estudiar otres llingües cola mio edá, yá que val más empezar dende bien tempranu. Yera perfeliz, conocíame y saludábame tol mundu, gustábame muncho dir al mercáu los miércoles.
¿Tabes tu solu o había más cures españoles?
Había unos cuantos y el capellán que yera’l que nos organizaba y tamién los había d’otros países. A mi tocóme dar misa n’italianu pa los italianos de la ciudá.
¿Cuála ye la to meyor esperiencia?
Pa mi la meyor esperiencia que pasé foi nuna procesión en Francia, yera una procesión pola virxen de Lourdes, que ye la virxen de los milagros y participaben los enfermos pa curase y entós yo llevaba a un neñu pequeñu en siella ruedes que taba enfermu de leucemia y al acabar la procesión díxome llorando que sintió que la virxen lu quería, que sabía que nun se diba curar, pero taba resguardáu. Eso foi los más guapu que vi y que me pasó.
Munches gracies por dexame facer esta entrevista.
