Les "non piscines" de Bimenes

por Ana Fernández Gálvez

L’otru día fui a da-y un paséu a los mios perros y pasamos per delantre de les piscines “ensin acabar”. Percatéme entós que llevaben ocho años paraes. Antes de qu’empezaren a faceles, tolos neños de San Xulián xugábemos ellí, había munchos camiones de los trabayadores y divertíamonos xugando al llaberintu. Cuando nos dixeron que diben a construir les piscines punxímonos percontentos, porque asina nun teníemos que baxar a les de Nava, nun ye que nun nos gusten, pero presta teneles al llau de casa y que nun dependemos de los pás pa dir. Empezaron a facese mui rápidu, pero al añu o asina dexaron de dir a trabayar los obreros; como nun tornaron pensábemos que taben de vacaciones. Col pasu los años solo tenemos un techu y los furacos pa les piscines. Quedamos toos un poco decepcionaos porque nin teníamos piscina nin sitiu pa xugar. Amás, nesi espaciu ye onde se facíen les fiestes de Nuestra Señora del Rosario y agora hai que cortar les carreteres pa poder faceles.

Queremos tener piscines, y si nun pue ser asina, pol motivu que seya, polo menos tapar los furacos y que quede lliso, porque se pueden facer distintes actividades. Por exemplu: el primer sábadu de cada mes faese un mercáu na plaza delantre de la ilesia; pero cuando llueve nun se pue facer, asina que si’l sitiu tuviera acondicionáu, podría facese ellí. Y como esto, munches otres actividaes, pero primero hai qu’igualo… y yá.