L’ Alzheimer nun entiende de tregües
por Lucía Suárez Díaz
Mio güelu tien 74 años. Lleva años con alzheimer. Veo la so figura cada vez que lu voi visitar a la so casa, echando un pigazu nel sofá, viendo la tele o lleendo‘l periódicu na terraza… Pero la mayoría de veces anda perhí tomando l’aire o cuidando los sos pumares. Dacuando, glaya, ponse agresivu, los sos güeyos camuden... nun ye él.
El costu poles investigaciones sobre les enfermedaes sé que nun ye pequeñu —37 000 millones d’euros en 2017 pal alzheimer—. Pero hai falta más. Nunca se sabe cuando te va garrar la enfermedá nin per onde va salir. Nunca nun cuántu tiempu vas vivir, unos meses, unes selmanes... Entiendo que pa la ciencia falar d’años nun tien apenes xacíu. Les grandes investigaciones, los grandes afayos, los descubrimientos de nueves enfermedaes, lleven años. Forniar una barra pan, ye na y menos. Poro, tendríemos qu’entamar a invertir yá.
Per otru llau, tan los tratamientos que dependiendo de la enfermedá puen tener demasiao costu yá sía pa la Seguridá Social —asistentes sociales, centros de día, centros residenciales, grupos terapéuticos, centros sociosanitarios especiales…—, yá pa les families, porque la persona que padez alzheimer precisa d’unos cuidaos que la mayor parte de les veces nun cuenta col sofitu del Estáu o esti nun llega a tiempu.
Per últimu, hai dalgo positivo que nos enseña esta enfermedá: recuerdanos qu’aprovechemos al máximu’l nuesu tiempu, los nuesos recuerdos y a los nuesos seres querios, ya que un día al despertar podemos dexar de tenelos na mente, anque ten físicamente con nosotros.
