L’ACOSU ESCOLAR Y EL CIBERACOSU

Por Aroa González Mori

Hai munchu tiempu, anque desgraciadamente l’acosu nunca pasa de moda, presencié un casu de bullying. Mirando les redes sociales, de sópitu, vi un videu que me llamó munchu l'atención. Yera un videu que se titulaba asina: “La muyer más fea del mundu”. Púnxime a velu y dexóme xelada. Rápidamente fui a lleer los comentarios y nun había más qu’insultos. Sentí muncha pena.

Nun voi dicivos que vos pongáis nel llugar d’esta chavalina —porque yera una neña— pos eso yá ta mui visto. Sí voi dicivos qu’esa neña, durante llargu tiempu, camentó nel suicidiu. Dempués, pensólo fríamente y convencióse de qu’aquello nun yera la solución. Entós decidió facer una campaña p’ayudar a xente que tamién padecía bullying. Un exemplu a siguir, ensin dulda.

N’España, el bullying o acosu escolar —entendiendo l’acosu como un hostigamientu repetíu nel tiempu— aumentó un 20% dende l'añu pasáu. Según un informe d’avientu de 2017 realizáu pola Universidá Internacional de la Rioxa, n’Asturies ún de cada diez alumnos/-es de Secundaria sufre acosu nel aula (casi 3.000, el 11,7%) o al traviés de les redes sociales (2.360, el 9,2%). Les cifres de los casos denunciaos son muncho más baxes. Tamién llama l’atención nel estudiu qu’un 4% ayuda al agresor o simpatiza con él y qu’ente un 22% y un 24% del alumnáu permanecen neutrales. Estes cifres son bien murnies y esmolecedores. ¿Qué ta pasando na sociedá?

Dende esti periódicu quiero dicir unes palabres a los “acosadores”. ¿Paezvos normal facer esto a una persona cuando nun se pue defender? Camiento que si vos paez normal ye porque’l celebru nun vos sirve pa nada, ye inesplicable’l dañu que facéis. Sois unos cobardes. Nun se vos pue llamar persones. Lo mesmo que los qu’ayuden o rin, lo mesmo que los que miren pa otru llau. Cobardes. Y a les “víctimes” tol mio sofitu y que procuréis nun rindivos. Allegáivos a los vuesos familiares, profesores, collacios… Intentái salir fuera y lluchar pol respetu que vos merecéis.