"A parte de dir a clas, díbamos a llindiar les vaques"

por Darío Iglesias G.

Enrique Granda Olivar ñació en Lluces en 1931, foi al colexu a Colunga, y nos años 60 coló a vivir a Llastres.Dende entos siempre s’interesó muncho pola historia del conceyu y del pueblu, y cualquier dulda que pueas tener sobre los últimos 100 años d’historia te la pué resolver.

E: ¿Cómo yeren les Navidaes nos años 40?

R: Les Navidaes yeren mui distintes, lo único que se comía meyor yera arroz con llechi, y los demás díes patates cocies con gochu. Pela nuechi farrapes.

E: ¿Xuntábase la xente como se fai agora?

R: No, en cada casa los suyos, pero nada n’especial.

E: ¿Dábense regalos Pol día Reyes?

R: Non, en Reyes, nun había regalos. Los primeros zapatos que tuvi fueron pa la primera comunión, enantes yeren madreñes. Yo quería unos zapatos de charol, porque me paecíen mui guapos.

E: ¿Qué comíeis?

R: Solo había dalgunes verdures como cebolles, patates y berces, pero nun había zanahoria nin tomate.

E: ¿Que facíeis per selmana?

R: A parte de dir a clas, díbamos a llindiar les vaques, y llevábamos pote o daqué de comer pa pasar el día, y ellí pasábamos el día ensin saber mui bien con qu’entretenese, pol branu cazábamos grillos, pero n’iviernu, nun había muncho más que facer.

E: ¿Cómo se celebraben otres festividaes?

R: Por exemplu en San Roque, díbase a la fiesta, na que les Bandes de música tocaben daqué, tol añu s’aforraba pal día de san Roque, pero asina y too nun podíes mercar casi nada. Sin embargu, el día’l xigante yera como agora, pero ensin pólvora, como un desfile de cabezudos. Pero la cucaña nun la había.

E: ¿En branu, diba la xente a la playa?

R: Yo nunca fui, y de Lluces y Llastes la xente nun solía dir. Por exemplu cuando tiraron El Monte de Lloréu en 1943, volcó’l barcu nel que se cargaben los maderos de Lloréu, y estos fueron arrastraos a les playes, asina que la xente diba a la playa a cortar la madera pa quedásela, pero nun diben a bañáse a la playa.

E: ¿Cuándo teníeis vacaciones de Navidá? ¿Cuantu duraben?

R: Teníamos dende 2 díes enantes de Navidá hasta Reyes, casi como güei.