EL MALTRATU ANIMAL

por Andrea Huerta Barzana

Los domadores d'un circu ambulante de Yiyang, nel sureste chinu, amarren a un tigre con cuerdes pa que neños y adultos puedan tocalu y facese semeyes con él. Tamién animen a la xente a subise al llombu del animal. Esti momentu foi grabáu por un espectador y fíxose viral circulando per tou internet. Nesti videu pue vese como l'animal yá nun tien nin fuerces pa movese.

Estos casos siempres los hubo, pero nun foi hasta hai pocu cuando la xente entamó a movilizase pa evitar qu'esto siguiera pasando. Toos podemos facer daqué por estos animales y el primera pasu ye dexar de dir a circos con animales pa nun da-yos beneficios económicos.

Anguaño esisten 17 lleis de proteición animal n'España, una por cada comunidá autónoma, polo que la situación de los animales ye perinxusta y desemeyada. Solamente en Cataluña aprobóse una llei que prohibe los circos con animales selvaxes nel so territoriu.

Anque a día de güei haya más proteición animal, tovía queda muncho por facer, como aprobar más lleis en tol territoriu y non una llei distinta pa cada comunidá autónoma, vixilar más el tema del abandonu de les mascotes, educar dende pequeños a los neños pa que nun maltraten animales…

Amás del maltratu nel circu, tamién quiero tocar el tema los zoos, onde tamién esiste maltratu animal pero menos visible pa la xente. Nos zoos, los animales son quitaos de la so llibertá y espuestos pa que'l públicu los vea y se faiga semeyes con ellos. A los animales impídese-yos facer la mayoría de comportamientos naturales pa ellos como correr, volar o esguilar. A pesar de tar nun recintu cerráu paez que puen facer lo que quieran y da la sensación de que viven inclusive meyor qu'en llibertá, pero nun ye asina, tan prisioneros. Nun tenemos derechu a interferir nes sos vides y mantenelos en cautividá pal nuesu entretenimientu.

Too esto solo ye una pequeña parte del maltratu animal qu'esiste en plenu sieglu XXI, yá que tamién considero maltratu la tauromaquia o la esperimentación con animales.

Como dixo Albert Schweitnez (premiu Noble de la Paz 1952): “Cualesquier que tea avezáu a faer de menos la vida de cualesquier ser viviente ta en peligru de faer de menos tamién la vida humana".

Asina que yá sabes, ¡contribúi a la erradicación del maltratu animal!