AMAR ENSIN COMPLEXOS
por Natacha Serrano
La RAE define la homofobia como‘l refugu a la homosexualidá o a les persones homosexuales, pero sedría más acertao definir esto como l'odiu escontra la llibertá yá que esto ye lo que verdaderamente ye.
Los humanos tamos tan avezaos a siguir les conductes del pasáu, a lo cual llamamos tradiciones, que nun queremos ver aquello que les trespasa porque nos asusta pensar que lo nuevo nun pue convivir colo d'antaño, porque nos da mieu tolo que ye distinto. Tenemos qu'aceptar que los humanos somos humanos n'igual estaya, ensin importar relixón, raza o orientación sexual. Non porque nos guste una muyer siendo muyeres o un home siendo homes somos menos que naide. Como perbién sabemos a estes altures l'amor nun estrema ente sexos, edaes nin cultures.
¿Cómo podemos llamar una sociedá avanzada cuando entovía ponemos milenta pegues porque una pareya LGTBI puea formar una familia? Una familia homoparental ye igual de normal qu'una familia tradicional, la única diferencia qu'hai ye que los neños suelen medrar nuna redolada enforma más llibre no tocante a pensamientu d’ igualdá ente los seres humanos. Crecer teniendo dos pás del mesmu sexu nun significa qu'un neñu tenga aseguráu que sía nun futuru parte del colectivu. Esto llévame a otru puntu que quiero esclariar. Les persones LGTBI desque nacen tienen esa forma d’ amar, solo que tarden más tiempu o menos tiempu en dase cuenta y n'aceptase tal como son. El “salir del armariu” nun ye solo una moda pasaxera, toes estes persones que tan dando esti pasu tan importante agora ye gracies a esos valientes que dieron el pasu enantes qu’ellos, hai tiempu, pa lluchar polos sos derechos, algamando que la sociedá dea pequeños pasos hacia una sociedá enforma mas abierta. Anguaño, estes persones siéntense muncho más sofitaos y llibres pa xunise a la llucha de los sos derechos.
El nuesu oxetivu como sociedá ye consiguir la normalización del coleutivu, esto significa que munchos países dean un pasu adelantre coles sos lleis y nun consideren la homosexualidá como un delitu; esto significa que les escueles se comprometan a educar a los neños/-es na diversidá d'orientaciones sexuales qu'esisten; esto significa que tanto heterosexuales como homosexuales nos respetemos mutuamente; esto significa que toos podamos sentinos llibres d'amar a quien queramos ensin complexos.
