REDES SOCIALES

por Aitana Mora Estévez

Anguaño, les redes sociales son un instrumentu al algame de tol mundu. La mayoría la xente tien una cuenta en dalguna rede social como Instagram, Facebook o Twitter. Pero, ¿son too bonos avances lo que traxo consigo esti tipu de plataformes?

En primer llugar, y ún de los avances más importantes, ye que con elles sumieron les distancies. Les redes faen más fácil la comunicación cola nuesa familia cuando tamos fuera de casa, colos amigos, o coles persones que tán lloñe de nós. Per otru llau, tamién nos informen de lo que pasa al nuesu alredor, por mor de que la mayoría de los periódicos cuenten con plataformes dixitales que tán incluyíes nes redes sociales. A esto hai qu’amestar que nos dan facilidaes a la hora de buscar trabayu, aportando una meyor comunicación ente la persona que lu solicita y la que lu busca.

Según un estudiu realizáu por IAB Spain 2015, un 82% de los internautes ente 18 y 55 años utilicen redes sociales, lo que se traduz en más de 14 millones d’usuarios nel nuesu país. Esto esplica que l’ usu d’estes plataformes avanza cada vez más y que foi ún de los cambios más importantes pa la forma de comunicación ente los seres humanos.

Pela cueta, anque son mayores les ventaxes, tamién podemos alcontrar dalgunos inconvenientes nel usu de les redes sociales. Ún de los más peligrosos ye que nestes plataformes incluyimos la nuesa información personal, y estos datos puen ser utilizaos na nuesa contra por dalgunes persones con males intenciones. Amás, tamién podemos publicar opiniones de los sitios a los que vamos y esto pue afeutar de dalguna forma a los negocios.

Con too y con eso, les redes sociales son mui útiles si les utilizamos con responsabilidá y col senciellu pensamientu de nun facer dañu a naide. Asina que ya sabes: ¡A navegar pel mundu de les redes sociales ensin mieu, pero con sensatez!