LOS DEBERES

por Óscar González Sempere

Nos colexos, tamos avezaos a que los profesores nos manden deberes pa que los faigamos en casa pela tarde. Ensin embargo, ¿benefícianos esto realmente?

Per un llau, ye una bona manera de facer que los estudiantes apriendan munches más coses de dalgunes asignatures como matemátiques, llingua, hestoria… Amás, d’esta manera, l’alumnáu pue prauticar y asina tar más preparáu pa los esámenes.

Per otru llau, pienso que nun ye bono pa los estudiantes tar sentaos tola mañana, y depués, al llegar a casa, siguir nuna siella más tiempu pa facer los deberes. Ye perimportante pa los xóvenes tar en movimientu, facer dalgún deporte, salir a pasiar, analayar pelos caminos... Amás, nos cursos escolares más avanzaos ye abondo trabayu’l que tenemos que facer coles pruebes escrites selmanales.

El 61% de los españoles considera que la xera que se-yos manda a los neños ye demasiada, según un estudiu de Metroscopia publicáu n’El País. Tan solu el 27% piensa que la cantidá ye la fayadiza. Dellos estudios afirmen qu’aproximao‘l 32% de los alumnos dediquen más de dos hores al día a los deberes. Amás, como consecuencia de llevar una vida tan abatanada, hai informes que demuestren que’l 10% de los neños sufren estrés y ansiedá.

En conclusión, los deberes son necesarios pa encarar los esámenes con meyores resultaos, pero tendría que controlase la cantidá, ya que too n'esecesu ye malo.