¿LLIBROS O TEUNOLOXÍA?

por Eva Amandi

Anguaño, hai numberosos alderiques sobre si realmente ye una meyora'l sustituyir los llibros polos ordenadores o les “tablets”. Dende'l mio puntu de vista, nun ye necesariu sustituyilos, l'ordenador tien de ser una ferramienta complementaria que nos ayude a estudiar.

L'usu enllargáu énte les pantalles, yá sía d'ordenadores o de “tablets”, ye nocivu pa la salú, provocando problemes de visión, principalmente fatiga visual. Amás, esiste mayor probabilidá de que los alumnos se distraigan en clas con xuegos online o chateando colos sos amigos. Tamién, convién destacar qu'anque ye posible en dellos documentos sorrayar o tomar notes, en dalgunos otros nun lo ye, como por casu los PDF y eso complica más l'estudiu. De fechu, según la OCDE, los ordenadores na escuela nun ameyoren les notes de los estudiantes. Otra desventaxa del usu de la teunoloxía ye que pue fallar la wifi y nun poder aportar a los documentos. ¿Y qué me dices del dineru? Munches persones piensen que l'usu d'ordenadores aforra dineru, pero en realidá, para aportar a delles plataformes y adquirir los llibros online tienen de pagase unes cuotes que son casi equivalentes al preciu de los llibros en papel.

Sicasí, si s’usa como una ferramienta complementaria, evitaríense los problemes de visión y les distracciones diaries. Per otru llau, podríen faese consultes sobre un tema d'investigación y ampliar asina les nueses conocencies o resolver duldes. Ye importante tamién mentar l'usu de plataformes como Youtube que nos apurren videos con esplicaciones bien clares. Otra ventaxa ye que los ñeños tan más entreteníos y aquellos que tienen bona memoria visual, son capaces de captar muncha información en pocu tiempu. En contraposición colos problemes de vista que xenera l'usu enllargáu de les pantalles, l'usu del ordenador en llugar de llibros evita que nos pesen tantu les mochiles y ameyora los problemes de llombu.

Al mio pensar, esisten numberoses desventaxes al sustituyir los llibros pola teunoloxía que pueden ser bien importantes. Sicasí, si s’utiliza esta como una simple ferramienta complementaria los sos beneficios son mayores.