L’ALUMNÁU DE LLUCES CONSIGUE LA LLIMPIEZA DEL CAMÍN DEL CASTIELLU

20 setiembre 2017 / por Natacha Serrano

Dempués de dos años trabayando col Ayuntamientu de Colunga esti branu, l’alumnáu del IES LLUCES consiguió la llimpieza del camín que lleva hasta ‘l castiellu de Llastres, que tien un gran interés turísticu ya históricu.

Too entamó nel añu escolar 2015-2016 cuando l´alumnáu de la clas d’Ética de 3º ESO propunxo idees p’ameyorar la redolada de la zona na que vivíen. De les munches propuestes la que más-yos interesó foi la llimpieza del camín que lleva hasta´l castiellu de Llastres. A partir d'esta decisión punxéronse a trabayar na propuesta papresenta-yla al Ayuntamientu de Colunga.

Depués de trabayar casi tol añu escolar dos alumnos representantes de la clas presentaron-y, hacia mediaos de mayu la proposición a la concelaya de cultura del Ayuntamientu de Colunga, Sandra Cuesta Fanjul. Tres casi un mes algamaron una respuesta positiva per parte d’esta entidá. La conceyala dixo-yos que se pondría a trabayar en dalguna de les idees propuestes pa llimpiar el camín.

A la fin, al comienzu d'esti branu 2017 fízose la llimpieza dexando asina un motivu más pa pasiar peles cais llastrines.